‘U Rwanda rwemeye gukora ubucuruzi bw’impunzi Ku madorari 5,000 ku muntu umwe”. Gashakabuhake Kagame ageze aharindimuka pe! Ntaho atazashakira amafaranga. Amasoko yose yo mu Rwanda n’aye. Umuntu wageze n’aho arwanira isoko ryo gucuruza isombe hanze y’igihugu n’abanyarwanda ntiyakwitesha ririya soko ryo gucuruza ikiremwa muntu nk’uko abacakara bacurujwe mu kinyejana cya 21.
Nyuma yo kwiba ku ma konti y’abanyarwanda muri banki akurikijeho ubucuruzi bw’abantu. Mbese arashakisha amafaranga kubura hasi kubura hejuru. Asigaje kugurisha abanyarwanda nako reka noye kwigiza nkana kuko icyo gitekerezo agifite kuva kera ngo aho yashatse kujya gutuza abanyarwanda muri Congo kubera ko u Rwanda nta masambu ahagije rufite. None ngo u Rwanda rugiye kwakira impunzi 40,000 ziva muri Israël ku madorari ibihumbi bitanu kuri buri muntu!!! Mbega urukozasoni? Abanyarwanda nabo ntibafite ubutaka buhagije ngo none Kagame agiye kwakira izo mpunzi? Mushikiwabo yarivugiye ngo “ntabutaka buhagije u Rwanda rufite ngo ariko tuzagerageza tubashakire aho kuba”. Ubwo ni muri ya midugudu bubaka ikabura abayitura. Izakwira se abantu ibihumbi 40? Ubwo nibyo bihumbi $3500 bazaha buri munzi kugirango igende izabone ikiyitunga Kagame nayo ayafitiye umugambi. Ntabwo azabatuza muri iyo midugudu ku busa bazishyura utwo dufaranga maze natwo adukubite umufuka.
Ese niwe leta y’afurika ifite ubutaka buhagije bwo gutuza izo mpunzi? Hano yerekanye inda nini pe! Kandi abanyarwanda baravuga ngo inda nini yishe ukuze. Ibi bintu Kagame arimo akora arimo arikungurira. Ntawanze ko impunzi zibona aho ziba ariko mwibaze mwese ikihishe inyuma ya ziriya mpuhwe za Bihehe.
U Rwanda rwatanze umusanzu mu Kwakira zimwe mu mpunzi zagizwe abacakara muri Libya”
Mbega impuhwe. Sinzi uwavuze ko Kagame arimo ashaka ibiraka by’indege ze. Ntabwo yabeshye kuko Kagame ntacyo atazakora ariko ifaranga ryinjire mu mufuka we, ifaranga ryiyongere konti zikomeze zibyimbe.
U Rwanda rumaze imyaka irenga 50 rwigenga : Ubuhake ntaho bwari butaniye n’Ubucakara
Ubutegetsi bwa Kagame ntaho butaniye n’ubutegetsi bw’ingoma ya cyami aho ibintu byose byari iby’umwami. Abari mu nzego z’ubutegetsi gakondo bari bashinzwe kuvana mu baturage ibiribwa bikomoka ku buhinzi no ku bworozi bigomba kugemurwa ibwami. Ku ngoma ya Kagame murabizi neza ko naho aruko. Abaturage bararira ayo kwarika. Twibaze ukuntu umuturage yari yaragowe ku ngoma ya cyami. Ntacyo yasigaranaga. Ni yo mpamvu abamotsi bagiraga akamenyero kabi kitwaga “gutora”. Ni ukuvuga kuzenguruka mu rutoki rw’umuturage ruri kwana, agashyira ikimenyetso ku nsina zizera ibitoki byiza kandi binini kurusha ibindi, akavuga ati “iki gitoki nikimara gukomera, kizaba icy’umutware”. Ngibyo ibyo Kagame yirirwamo akaba yarajujubije abacuruzi, abaturage nabo ngo bahinge igihingwa kimwe aho usanga abaturage bose bahinze ibigori kandi nyuma iyo byeze usanga bazasabwa kubigurisha bagashaka ibishyimbo’’. N’iyo abaturage bahinze igihingwa kimwe iyo cyeze basabwa kukigurisha ku makoperative ugasanga ya mafaranga bakuyemo ariyo bajya gushakamo ibiribwa kandi bakagombye kubyihingira. Ibi bikaba byarabaye nyirabayazana y’inzara mu Rwanda. Iyi ni politiki ya ba rusahurira mu nduru. Izo mashini Kagame yaguze zitunganya ibigori zizabone ibiraka ryari?
“U Rwanda rwinjiye mu bucuruzi bw’abacakara!!!!!” Ibi byinjiye tayari mu mateka y’isi yose. Nguwo icyamamare Kagame ugejeje u Rwanda aharandimuka. Mu mateka ubwo bazajya bavuga ngo u Rwanda rwakoze ubucuruzi bw’abacakara mu mwaka wa 2017. Ku butegetsi bw’uwitwaga Paul Kagame. Kudos Kagame!!
James Ngoboka
Pretoria, South Africa
