Nk’uko Umukuru w’Abarundi baba mu mahanga, Japhet Legentil Ndayishimiye abimenyesha, Diaspora ngo irashima ingene umwe mu rwaruka rwo muri Kanada Paul Henry yaraye atanze intahe y’ingene yiyumviriye nabi igihugu ciwe na cane cane Umukuru w’Igihugu c’u Burundi Petero Nkurunziza, maze agahitamwo guhindura ingendo.
Si agaseseshwa rumuri urwaruka rwinshi rwafashe inzira idashika ruhenzwe, rukurikira abariko bararwanira inyungu zabo mu gusinzikanza ubuzima bw’abanyagihugu. Abarundi mu budasa bwabo barashima ko urwaruka rutanguye gushikiriza aho ruhagaze ata gitsure canke kumviriza uyu canke uriya.
Japhet Legentil ati “Twagomba vy’umwihariko nk’Umurongozi w’abarundi baba mu mahanga, gushigikira Paul Henry ahagarare neza, kuko yavuze ivyo abarundi ibihumbi n’ibihumbi baba hanze biyumvira bagatinya kubivuga. Paul Henry yabivuze yemye, yishimiye ko aruhutse mu mutima”.
Ati twagomba tumutere intege n’umuvyeyi yamwibarutse. Yamuhaye indero yo kubona kure no kurengera ibidutandukanya abarundi. Ati turazi ko hari abo bidashimisha bazovuga ibi canke biriya, ntibimuteshe umurongo ahubgo birushirize kumuha inguvu zo gukunda igihugu ciwe. Ikinyamakuru Amahoro Iwacu cipfuje kumenya ico abarundi biyumvira ku vyashikirijwe na Paul Henry, uretse Rose wo muri Canada atashimye iciyumviro ciwe, abandi barundi barenga 90% barashima ko urwaruka mu budasa bwabo bashikiriza aho bahagaze. Japhet Legentil Ndayishimiye arangiza avuga ati «Ku bwacu tuzokora ivyo dushoboye kugira indoto za Paul Henry zironke inyishu. Dusavye n’abandi bafise ivyiyumviro nk’ivyo vyubaka imitima y’abarundi kudatinya kubishikiriza». Tubibutse ko Abarundi baba mu mahanga bahamagarirwa kuba aba aba ambassadeurs bukuri, maze bakereka abanyamahanga ko bakunda igihugu cabibarutse.
Anselme Hakiza
Amahoro Iwacu
